Казакстан менен товар алмашуу келишимине ылайык, аларга быйыл 300 млн м³ суу беребиз – Жапаров
Казакстан менен товар алмашуу макулдашуусуна ылайык, аларга быйыл 300 млн м³ суу беребиз. Бул тууралуу бүгүн, 15-февралда маалымат жыйынында Министрлер кабинетинин төрагасы Акылбек Жапаров билдирди.
Жапаровдун айтымында, Кыргызстан Казакстан менен товар алмашуу келишимине кол койгон. Ага ылайык, республика жылына 300 млн кубометрге чейин суу берет.
«Биз эл аралык келишимдерди аткарууга даярбыз. Алар бизге 153 млн киловатт/с электр энергиясын бере элек, бирок толугу менен беребиз дешти. Ошондой эле алар бизге транзит да берип жатышат», – деди Жапаров.
Белгилей кетсек, Токтогул суу сактагычында бүгүн, 15-февралга карата 8.575 млн куб метр көлөмүндөгү суу бар. Суунун тартыштыгынан улам, республика учурда Токтогул ГЭСиндеги өндүрүштү азайтып, электр энергиясын импорттон алып жатат.
- Суу сактагычтагы суунун максималдуу деңгээли – 19.5 млрд кубометр, нормалдуу көлөмү – 17.3 млрд болсо, пайдалуу өлчөмү – 14 миллиардды түзүш керек. Бирок кургакчыл мезгилдерден улам Токтогулдагы суу азайып жатат.
