Жалал-Абадда кар көчкү түшүп, 3 жаран дайынсыз болууда
Кечээ, 14-февралда саат 12:30 чамасында Тогуз-Торо районуна караштуу Түндүк – Түштүк (Балыкчы – Жалал-Абад) альтернативдик унаа жолунунун болжол менен 334-чакырымында (Көк-Арт ашуусу) кар көчкү түшкөн. Бул тууралуу ӨКМ маалымдады.
Кар көчкү «Чайна Роуд» ишканасына тиешелүү Нива, жүктөгүч жана 2 экскаватор унааларын басып калып, 3 киши дайынсыз болууда.
Жерине Тогуз-Торо райондук өзгөчө кырдаалдар бөлүмүнүн 6 куткаруучусу, Жалал-Абад облустук башкармалыгынын ыкчам тобу, ӨКМдин жалпы 20 куткаруучусу тартылган. Учурда «Чайна Роуд» ишканасынан 4 даана жүктөгүч, 30 кызматкер тартылып издөө жана кар көчкүнү тазалоо иштерин жүргүзүүдө.
Кошумчалай кетсек, ушул эле жолдо саат 17:30да дагы кар көчкү түшкөн. Натыйжада, эки жол тандабас унаа кардын астында калып, унаа эңкейиштен дарыяга түшүп кеткен. Эки кыргызстандык жана бир кытай жараны жабыркаган. Бир жумушчу да дайынсыз жоголгон жана анын өздүгү такталууда. Ал эми жабыркаган эки кызматкер Сузак районунун Октябрь айылындагы ооруканага жеткирилген.
