БАЭ башкаруучулар үй-бүлөсүнүн мүчөсү Мансур Нахайян "Ала-Тоо Резорт" долбооруна кызыкты
"Ала-Тоо Резорт" долбооруна Бириккен Араб Эмираттарынын башкаруучу үй-бүлөсүнүн мүчөсү, шейх Мансур бин Зайд Аль Нахайян кызыгуу билдиргенин "Ала-Тоо Резорт" ААКы маалымдады.
Маалыматка ылайык, шейхтин кеңсесинин өкүлдөрү менен компаниянын жетекчилиги онлайн форматта сүйлөшүүлөрдү өткөрүшкөн. Тараптар Кыргызстанда жыл бою иштей турган тоо-лыжа кластерин куруу боюнча инвестициялык мүмкүнчүлүктөрдү талкуулашкан.
Сүйлөшүүлөргө Президенттик администрация жетекчисинин орун басары Азамат Кадыралиев да катышкан.
Компаниянын башкармалыгынын төрагасы Жаркынбек Максутов долбоордун концепциясын тааныштырды. Анда келечектеги комплекстин географиялык жайгашуусунун ыңгайлуулугу жана эл аралык туризмди өнүктүрүүдөгү потенциалына өзгөчө көңүл бурулган.
Талкуунун жыйынтыгында инвесторлор жакын арада өз инвестициялык сунуштарын даярдап, жөнөтүү ниетин билдиришти.
"Ала-Тоо Резорт" кластери буга чейин мамлекеттик маанидеги долбоор деп жарыяланган. Аны ишке ашыруу үчүн өкмөт Ысык-Көл облусу аймагынан жер тилкелерин бөлүп берип, салыктык жеңилдиктерди камсыздаган.
Шейх Мансур бин Зайд Аль Нахайян — Бириккен Араб Эмираттарынын таасирдүү саясатчыларынын бири, Абу-Даби эмирлигинин башкаруучу королдук үй-бүлөсүнүн мүчөсү. Ал БАЭнин вице-президенти, премьер-министринин орун басары жана президенттик администрация иштери боюнча министри кызматтарын аркалап келет.
