ЕРӨБ Борбор Азияда кредиттик тобокелдикти бөлүшүү программасын кеңейтти
Европа реконструкциялоо жана өнүктүрүү банкы (ЕРӨБ) Борбор Азия өлкөлөрүндө жана Монголияда кредиттик тобокелдикти бөлүшүү программасын кеңейткенин банктын Ташкенттеги өкүлчүлүгүнүн басма сөз кызматы билдирди.
Маалыматка ылайык, Risk Sharing Framework (RSF) алкагында ЕРӨБ өнөктөш банктар тарабынан жеке секторго берилген насыялардын кредиттик тобокелдиктеринин 50%ына чейинкисин өзүнө алат. Бул механизм банктарга чакан жана орто бизнести активдүү каржылоого мүмкүнчүлүк берип, ишкерлер үчүн каржы булактарына жетүүнү жеңилдетет.
2025-жылдын жыйынтыгында банк Борбор Азия жана Монголия боюнча 26 компания менен жалпы суммасы 28,5 млн еврону түзгөн 31 келишимге кол койгон. Колдоо негизинен кайра иштетүү өнөр жайы, тамак-аш өндүрүшү, агробизнес жана кызмат көрсөтүү тармагындагы ишканаларга багытталган.
Тактап айтканда, Кыргызстанда алюминий профилдерин өндүргөн Steelex компаниясы 4,8 млн доллар көлөмүндө каржылоо алса, HTI Group ишканасына жабдууларды жаңылоо үчүн 1,1 млн доллар насыя берилген. Өзбекстанда Trade Novatik компаниясы 1,1 млн евро насыя алып, өндүрүшүн кеңейтүүдө. Ошондой эле Silkway Color ишканасы 2,8 млн долларга энергия үнөмдөөчү басма жабдууларын сатып алды.
ЕРӨБ тобокелдикти бөлүшүү инструменттерин 2000-жылдардын башынан бери колдонуп келет. Бүгүнкү күндө банк Борбор Азияда 21 млрд евродон ашык суммага 1 250дөн ашуун долбоорду каржылаган.
