Индиянын КРгы Элчиси Алок Димринин дипломатиялык миссиясы аяктады
Кечээ, 15-февралда Кыргызстандын Тышкы иштер министри Руслан Казакбаев Индиянын КРгы Атайын жана Ыйгарым укуктуу Элчиси Алок Димрини дипломатиялык миссиясынын аяктагандыгына байланыштуу кабыл алды. Бул тууралуу ТИМдин маалымат кызматы билдирди.
Жолугушуунун жүрүшүндө эки тараптуу кызматташуунун актуалдуу маселелерин жана долбоорлорду, анын ичинде КР менен Индиянын ортосундагы ѳз ара түшүнүшүү жѳнүндѳ меморандумду жана 200 млн доллар өлчөмүндө Индия Өкмөтү тарабынан берилүүчү кредиттик линиянын алкагында долбоорлорду ишке ашыруу боюнча мындан аркы кызматташуунун келечеги тууралуу пикир алмашуу болду.
Казакбаев учурда Кыргызстан менен Индиянын ортосунда достук жана ишенимдүү мамилелер түзүлүп, саясий, экономикалык, маданий-гуманитардык, ошондой эле коопсуздук тармактарда өз ара пайдалуу кызматташтык түзүлгѳнүн белгилеп кетти.
Кыргыз тарап Индия менен IT-технологиялар, фармацевтика, гидроэнергетика, туризм, тоо-кен өндүрүшү, текстиль өнөр жайы, айыл чарба органикалык продукциясын өндүрүү жана билим берүү тармагында биргелешкен долбоорлорду ишке ашырууда кызматташууга кызыкдар жана даяр экендигин билдирди.
Жолугушуунун соңунда Казакбаев Алок Димриге Индиянын Кыргызстандагы Атайын жана Ыйгарым укуктуу Элчиси кызматындагы жемиштүү иши үчүн ыраазычылык билдирип, жаңы кызматында ийгиликтерди каалады.
