Республикада 25 комбинатта 500 тоннадан 2 миң тоннага чейин ун бар – Жапаров
Республикада 25 комбинатта 500 тоннадан 2 миң тоннага чейин ун турат. Мындай маалыматты бүгүн, 16-февральда Жогорку Кеңештин жыйынында Министрлер кабинетинин төрагасы Акылбек Жапаров билдирди.
Анын айтымында, өткөн жылы КР резервке 1.5 млрд сомго буудай сатып алган.
«Бүгүнкү күндө иштеп жаткан комбинаттардын саны 25тен ашты. Башында 300 киши иштеп жатса, учурда 3600дөн ашып калды. Эң оболу, ошол комбинаттарда 500 тоннадан 2 миң тоннага чейин ун турат», – деди ал.
Ошондой эле Жапаров азык-түлүк коопсуздугун камсыздоо үчүн 9 кластерди ишке киргизип жатышканын жана ага 9 млрд сомду даярдап коюшканын кошумчалады.
«Биз 60 млрд сомдон ашык акчаны импортко жумшап атабыз. Азык-түлүктүн дээрлик көпчүлүгүн чет мамлекеттен алып келип, биз инфляцияны бөлөк жактан алып келип жатабыз. Инфляциянын дээрлик көпчүлүк көлөмү дээрлик импорттон келет, анткени долларга көз карандыбыз. Күйүүчү майдын баасын биз контролдой албайбыз, буудайдын баасын дагы контролдой албасак, нан кымбат боло берет», – деди Министрлер кабинетинин төрагасы.
Жапаров азык-түлүк коопсуздугун чечүү үчүн 5 жылдык стратегия бекитилгенин, ага ылайык, 9 азыктын түрү боюнча 100% чечилиш керектигин айтты.
