Кыргызстан Украинадагы жаңжалды токтотууга тынчтык сүйлөшүүлөрү үчүн аянтча берүүгө даяр – ТИМ
Кыргыз тарап Россия-Украинанын тынчтык сүйлөшүүлөрү үчүн аянтча берүүгө даяр. Мындай позицияны КРнын Тышкы иштер министри Руслан Казакбаев 22-мартта Исламабад шаарында Ислам кызматташтык уюмунун тышкы иштер министрлер кеңешинин 48-жыйынынын алкагында АКШнын Мамлекеттик катчысынын жарандык коопсуздук, демократия жана адам укуктары боюнча орун басары Узра Зея менен жолугушуу учурунда билдирди.
ТИМдин маалыматына ылайык, жолугушууда Украинадагы учурдагы кырдаал талкууланган. Казакбаев Кыргызстан орус эли менен да, украин эли менен да тыгыз достук байланышта экенин жана КР ар кандай чыр-чатакты саясий жана дипломатиялык жол менен сүйлөшүүлөр аркылуу гана, анын ичинде жаңы форматтарды жана механизмдерди түзүү жолу менен чечүү зарыл экенин белгилеген.
«Казакбаев Украинадагы куралдуу жаңжалды токтотуу үчүн эл аралык коомчулук мындан ары тынч жашаган калктын курмандыктарын болтурбоо үчүн бардык зарыл болгон күч-аракеттерди жумшоо керектигин белгилеп, кыргыз тарап тынчтык сүйлөшүүлөрү үчүн аянтча берүүгө даяр экенин дагы бир жолу белгиледи», – деп айтылат билдирүүдө.
Ошондой эле тараптар коопсуз гуманитардык коридорлорду камсыз кылуунун, ошондой эле тынчтык сүйлөшүүлөрүн улантуунун маанилүүлүгүн белгилешкен. Казакбаев КР БУУнун Уставында каралган жалпыга таанылган эл аралык укук ченемдерин жана принциптерин, анын ичинде мамлекеттердин аймактык бүтүндүгүн жана чыр-чатактарды тынчтык жолу менен чечүүнү жактай тургандыгын белгиледи. Министр ошондой эле бул жаңжалды жөнгө салууда БУУнун Коопсуздук кеңешинин ролун күчөтүү зарылдыгына басым жасады.
Өз кезегинде АКШнын Мамлекеттик катчысынын орун басары Зея БУУнун Уставынын принциптерин жана ченемдерин сактоо жана Украинадагы кырдаалды тынчтык жолу менен чечүү зарылдыгы тууралуу кыргыз тараптын пикирине макул экендигин билдирди.
