«Керемет Банк» каалоочуларга 8% менен 25 жылга чейин ипотекалык кредит берет

Мамлекеттик ипотекалык компания (МИК) «Керемет Банк» ААКсы менен биргеликте КРнын турак жай программаларын ишке ашыруунун алкагында кызматташуу боюнча Башкы келишимге кол коюшту. Бул тууралуу МИКтин маалымат кызматы билдирди.

Макулдашуунун алкагында кызматташуунун негизги багыты өлкөнүн жарандарына үлүштүк курулушка катышуу үчүн ипотекалык насыя берүү аркылуу турак жай программаларын ишке ашырууга курулуш компанияларын тартуу болуп саналат.

Үлүштүк курулушка байланыштуу тобокелдиктерди четтетүү максатында «Керемет Банк» ААК жакын арада курулуш компанияларынын арасында аккредитация өткөрөт. Аккредитациянын жыйынтыгы боюнча банк менен кызматташуу үчүн курулуш компаниялар тандалып алынат.

Натыйжада өлкөнүн жарандары (Турак жай программаларынын катышуучулары) аккредитация алган курулуш компанияларынан курулуп жаткан турак жайларды сатып алуу үчүн ипотекалык насыя ала алышат.

• Үлүштүк курулушка катышуу үчүн ипотекалык кредиттер турак жай программаларын тандоонун негизги критерийлерине жооп берген өлкөнүн бардык жарандарына (иштеген чөйрөсүнө карабастан) жеткиликтүү болот.

• Негизги тандоо шарттары: жылдык 8%, 25 жылга чейин, сатып алынган турак жайдын наркынын 20%дан кем эмес баштапкы төлөм.

Ошону менен бирге, курулуш компаниялары курулуш аяктагандан кийин турак жай программасынын катышуучуларын толук даяр болгон шартта турак жай менен камсыздайт, бул жарандарга ремонт иштеринде акчаны жана убакытты үнөмдөөгө мүмкүндүк берет.

«Турак жай программасына курулуш секторун тартуу өлкөнүн жалпы турак жай фондун көбөйтүүгө түрткү берет, ошондой эле жаңы турак жайларды сатып алуу жагынан калкты стимулдаштыруунун кошумча рычагы болот», – деп айтылат билдирүүдө.