26-27-майда өтүүчү форумга карата Бишкектин айрым көчөлөрү убактылуу жабылат – тизмеси
26-27-майда Бишкекте Евразиялык экономикалык форум өтөт. Ага карата Бишкек шаарында жана Чүй облусунда унаалардын кыймылына убактылуу чектөөлөр киргизилет.
«Кабар» агенттигиндеги маалымат жыйынында Жол кыймылынын коопсуздугун камсыздоо мекемесинин өкүлү Байыш Ашырбековдун айтымында, жол коопсуздугун камсыздоого 660 кызматкер жана 180 автоунаа тартылган.
Унаа жолдору болжол менен 15-20 мүнөткө убактылуу жабылып турат.
Төмөндөгү жолдор убактылуу жабылат:
- «Манас» аэропортунан баштап Фучик көчөсү менен Жибек Жолу проспектисине чейин
- Жибек-Жолу проспектиси, Фучик көчөсүнөн Жаш Гвардия бульварына чейин
- Жаш Гвардия бульвары, Жибек Жолу проспектисинен Чүй проспектисине чейин
- Чүй проспектиси, Жаш Гвардия бульварынан Манас проспектисине чейин
- Манас жана Чынгыз Айтматов проспектилери, Чүй проспектисинен Мамлекеттик резиденцияга чейин
- Чүй проспектиси, Манас проспектисинен Абдрахманов көчөсүнө чейин
- Абдрахманова көчөсү, Чүй проспектисинен Фрунзе көчөсүнө чейин.
«Өткөрүлүп жаткан иш-чаралардын маанилүүлүгүнө байланыштуу убактылуу киргизилген чектөөлөргө шаардын тургундары менен конокторун түшүнүү менен кабыл алууга чакырабыз. Жолдо жүрүү эрежерин жана айдоочулук маданияттуулукту сактоого, транспорт каражаттарын жогоруда көрсөтүлгөн унаа жолдорунун боюнда таштап жана кароосуз калтырбооңуздарды суранабыз», – деди ал.
