Бишкек шаарына алынчу электробустар октябрь айында келиши күтүлүүдө
Бишкек шаарына алынчу электробустар октябрь айында келиши күтүлүүдө. Бул тууралуу «Парламент» радиосуна депутат Жаныбек Абиров билдирди.
Эскерте кетсек, Азия өнүктүрүү банкы (АӨБ) КРга автобустарды алууга жана Бишкектин транспорттук инфраструктурасын жакшыртууга жардам берүү үчүн 50.65 млн доллар бөлгөн. Анын 25 млн доллары насыя, 25 млн доллары грант түрүндө берилет.
«Электробустарды алууга каралган насыялык каражатка 120 даана транспорт келет. Анын наркы жакшы эле кымбат. Бирок анын күйүүчү май жагынан көп чыгым талап кылбаганы жакшы. Эми айтылган билдирүүлөргө караганда, электробустардын октябрь айында келип калышы күтүлүүдө. Алар шаардын борбордук бөлүктөрү менен калктуу конуштарды байланыштыруучу каттамдарга чыгарылат», – деди Абиров.
Белгилей кетсек, буга чейин келе турган электробустардын жол кире акысы 11 сом өлчөмүндө белгиленери айтылган болчу.
