Борбор Азия өлкөлөрүндө дүйнөдөгү шамал жана күндүн кубаттуулугунун 5% бар
Борбор Азия өлкөлөрүндө дүйнөдөгү шамал жана күндүн энергиясынын 5%га жакыны бар. Бул тууралуу маалымат Алматы шаарында WECOOP долбоорун ишке ашыруу тобунун өкүлдөрү тарабынан уюштурулган семинарда айтылды.
Эки күндүк семинардын жүрүшүндө Борбор Азиядан келген эксперттер, Евробиримдиктин жана эл аралык финансы институттарынын өкүлдөрү күн жана шамал энергиясын өндүрүүгө багытталган долбоорлорду ишке ашыруу боюнча «жашыл» инвестицияларды талкуулашты.
Семинар «Европа Биримдиги – Борбордук Азия: суу ресурстары, айлана-чөйрө жана климаттын өзгөрүүсү (WECOOP) чөйрөсүндө кызматташуу» долбоору тарабынан күн, шамал энергиясы, ошондой эле энергия өндүрүүгө багытталган чакан жана орто долбоорлорду ишке ашырууда тажрыйба алмашуу максатында уюштурулган.
«Борбордук Азия чөлкөмүндө дүйнөдөгү шамал жана күн энергиясынын 5%га жакыны бар, бул энергиянын кайра жаралуучу булактарын өнүктүрүү үчүн кеңири мүмкүнчүлүктөрдү берет.
Бирок гидроэнергетикадан тышкары, энергиянын кайра жаралуучу булактарынын (ЭКБ) улуттук энергетикалык баланстардагы үлүшү Борбордук Азиянын бардык өлкөлөрүндө өтө аз. Региондун кайра жаралуучу энергиянын олуттуу потенциалы көптөгөн финансылык, техникалык жана социалдык тоскоолдуктардан улам толук пайдаланылбай жатат», – деп айтылат маалыматта.
