Криптовалюта деген эмне? – Илья Варламов
24-февралдан тартып Россияда доллар менен евро сатып алууга жана аларды өлкөдөн чыгарууга чектөөлөр киргизилген. Эми болсо банктар валюталык счёт кармоого комиссия киргизип жатат. Өлкөдөн чектөөсүз акча чыгаруунун бир түрү – бул криптовалюта, дейт блогер жана журналист Илья Варламов бүгүнкү чыгарган видеосунда.
«Жөнөкөй акчадан айырмаланып, криптовалютанын материалдык формасы жок, алтын же башка баалуу материал менен бекемделген эмес. Чындыгында, бул жөн гана блокчейнде жазылган сан. Анын баасы криптовалюталык рыноктун бардык мүчөлөрүнүн макулдашуусу менен гана камсыздалган. Башкача айтканда, 1 даана криптовалюта канчага бааланары жөнүндө баары макулдашып гана чечип коюшат. Жөнөкөй акчадан айырмалаган эң негизги өзгөчөлүгү – бул түздөн-түз башка адамга өткөрүп берүү мүмкүнчүлүгү. Кагаз акчаны да түздөн-түз бирөөгө берсе болот дечи, бирок азыркы заманда эч ким баштыкка толтура акча көтөрүп жүрбөйт. Ал эми алыстагы адамга банк сыяктуу ортомчусуз акча жөнөтүү мүмкүн эмес. Банк болсо ортодон комиссия алат, документтерди сурайт, акча которууңузду бербей да коё алат. Дүкөндөрдө сиз карта менен албетте, комиссиясыз төлөй аласыз, бирок ал комиссияны же дүкөн төлөйт, же сиз сатып алган товарлардын баасына эбак киргизилген. Демек, сиз баары бир банктын комиссиясын төлөйсүз.
Криптовалюта менен болсо, эч кандай ортомчу кереги жок. Операциялар блокчейндин өзү аркылуу жүрө берет. Каражатты дүйнөнүн кайсы жеринде болсо да, түздөн-түз башка адамга өткөрүп берсе болот. Бул убакытты жана акчаны үнөмдөйт, ошондой эле ыңгайлуу. Дагы бир артыкчылыгы – бул көзөмөлдөнбөгөн төлөмдөрдү жүргүзүү. Мамлекет эч кандай түрдө сиздин криптовалюта түрүндөгү каражатыңызды контролдой албайт, айрым өлкөлөргө которууларга тыюу сала албайт. Анткен “крипто” деген сөз грек тилинен “жашырын”, “сырдуу” деп которулат», – деп түшүндүрөт блогер.
Чындыгында криптовалюта, биткоин деген сөздөрдү көп укканыбыз менен, ал эмне экенин түшүнө бербейбиз. Ал эми бул алыскы келечек эмес, азыркы учурга байланыштуу нерселер. Алтын, күмүш тыйындардан акча кагазга, андан кийин электрондук төлөмдөргө өткөндөй эле, акчанын бул түрү жөнүндө да билип алуу зарыл.
Криптовалютанын түрлөрү көп, бирок алардын баары блокчейн технологиясына негизделип, бир принцип менен иштейт. Чыныгы акчаны криптовалютанын кайсы бир түрүнө өткөрүүдөн мурда, анын тарыхын интернеттен изилдөө керек.
