1.5 миң адам турак жай шылуундарынан жапа чекти — зыяндын суммасы 900 млн сомдон ашты
2022-жылы 1524 адам турак жай кооперативинин алдамчылыгынан жапа чеккен. Жалпысынан алар дээрлик 902 млн сомдук зыян тартышкан. Бул тууралуу ИИМдин маалыматы боюнча “Кабар” агенттиги билдирет.
2022-жылдын 12 айында турак жай-курулуш кооперативинин ишмердүүлүгү боюнча «Ак үй КЖ», «Жилье гарант», «Элдик Групп», «Ихсан Групп ЛТД», «Береке ЛТД», «Дарим Хаус», «Ордо-Мурас», «М строй групп», «S-Line», «Биринчи турак-жай кооперативи», «Ансар», «Ипотека», «МПК кооперативи», «Нью миллениум», «Эл биримдиги» ишканаларына карата 16 арыз жана даттануулар келип түшкөн.
Алдангандардын саны – 1 миң 524 адам. Келтирилген материалдык чыгым 901 млн 726 миң сомдон ашык. Учурда 108 млн 855 миң сомдон ашык чыгымдын орду толтурулду.
«Турак жайга суроо-талап көп болгондуктан, кыймылсыз мүлк рыногунда ар кандай түрдөгү жана формадагы сунуштар көбөйүүдө. Бирок алардын баары эле сатып алуучулардын таламдарын коргобойт. Мыйзам коммерциялык эмес турак жай-курулуш кооперативдерин түзүүгө тыюу салбайт, бирок кыймылсыз мүлк рыногунда ишмердүүлүгү финансылык пирамидага окшош кооперативдердин болушу тынчсыздандырат», – деп айтылат ИИМдин билдирүүсүндө.
