Кыргызстанда немис заводдорун ачуу жана кыргызстандыктарды Германияда ишке орноштуруу маселеси Мюнхенде талкууланды
Инвестициялык агенттиктин директору Умбриэль Темиралиев Германияга болгон иш сапарынын алкагында Бавария федералдык мамлекетинин административдик борбору Мюнхен шаарынын бийлик өкүлдөрү менен жолугушту. Бул тууралуу аталган башкармалыктын басма сөз кызматы билдирди.
Маалыматка ылайык, Мюнхен жана Жогорку Бавариянын Соода-өнөр жай палатасынын аткаруучу директору, Бавариянын Азык-түлүк, айыл чарба жана токой чарба министрлигинин департаментинин директору жана Экономика, жер иштетүү жана энергетика министрлигинин интернационализация, жайгаштыруу саясаты жана инвестициялар департаментинин директору менен сүйлөшүүлөр болуп өттү.
Негизги маселелер катары немис компанияларынын кыргызстандык адистердин квалификациясын жогорулатууга жана адистештирилген окуу программаларына катыштырып, андан ары жумушка орноштуруу боюнча Кыргызстан менен Бавария федералдык жергесинин ортосундагы экономикалык кызматташтыкты өнүктүрүүнүн учурдагы багыттары талкууланды.
Ошондой эле Кыргызстанда жеңилдетилген тарифтерди берип, айыл чарба техникасын өндүргөн Германиянын көрүнүктүү заводдорунун запастык бөлүктөрүн жана тетиктерин өндүрүүнү жайгаштыруу тууралуу сөз болду.
Талкуунун башка темалары төмөнкүлөр болду:
- Ата мекендик органикалык айыл чарба продукциясын (мөмө-жемиштер, кургатылган жемиштер, топоздун эти) Европа Биримдигине, анын ичинде Германияга экспорттоону уюштуруу.
- 2023-жылдын апрель айында Мюнхен шаарында Кыргыз-герман ишкерлер кеңешинин экинчи жыйынын өткөрүү жана Бавариянын Экономика, жер иштетүү жана энергетика министрлигинин статс-катчысы Роланд Вайгерттин 2023-жылдын июль айында Бавариянын ишкерлери менен бирге Кыргызстанга иш сапары.
Жолугушуунун жыйынтыгында эки тарап кызматташтыкты өнүктүрүү жана Бавария федералдык жергеси менен ар түрдүү багыттар боюнча узак мөөнөттүү кызматташуу стратегиясын иштеп чыгуу зарылчылыгы боюнча бир түшүнүккө келишкенин Инвестиция агенттиги билдирди.
