Кооперативди мамлекет эмес, уюмдун мүчөлөрү көзөмөлдөш керек – Кубан Чороев
Турак-жай-курулуш кооперативдери уюмдун м´үчөлөрү тарабынан контролго алынууга тийиш. Мындай пикирди Economist.kg уюштурган «Кооперативдер — турак жай маселесин чечүүнүн жолубу же көйгөйбү» деп аталган темада тегерек столунда эксперт Кубан Чороев билдирди.
Эксперттин айтымында, кооперативдердин ишинде демократиялык принцип сакталып, байкоочу кеңешти мүчөлөр өздөрү шайлайт.
«Муну саясий партиялар менен салыштырса болот, эл биригип, өзүн өзү башкарат. Ал эми мамлекеттик органдар ал жакка келип, алардын ишине кийлигишпейт. Убагында мамлекеттик органдар кооперативдердин ишин жакшыртуу үчүн зарыл мыйзамдарды кабыл алган эмес», — деп белгиледи Чороев.
Белгилей кетсек, Кубан Чороев «Бест-Вэй Элет» турак жай-курулуш кооперативинин кеңешинин мүчөсү. Ал кооператив 2018-жылы түзүлгөнүн, бирок 2020-жылдан бери кооператив текшерүүгө алынып, анын эсебине бул уюмдун акционерлерине тиешелүү 50 млн сом бөгөт коюлганын айтты.
«Биз азыр бул каражаттарды алалбай жатабыз. Кооперативдин мүчөлөрү акчасын уюмдун ишмердүүлүгүнөн эмес, мамлекеттик органдардын начар иштегендигинен ала албай жатышат», — деп жыйынтыктады Чороев.
