Кооперативдердин Кыргызстанга дал келе турган формасын таап, ошого ылайык мыйзам иштеп чыгыш керек - Айнура Иманбекова
Кооперативдердин Кыргызстанга дал келе турган формасын таап, ошого ылайык мыйзам иштеп чыгыш керек. Мындай пикирин Economist.kg басылмасы уюштурган «Кооперативдер — турак жай маселесин чечүүнүн жолубу же көйгөйбү» деген темадагы тегерек столдо Кыргызстандагы Кооперативдер бирикмесинин төрайымы Айнура Иманбекова айтты.
Анын айтуусунда, Кыргызстанда калк, бийлик кооперативдердин табиятын дагы деле түшүнүшө элек жана бирок бул дүйнөлүк тажрыйбада ийгиликтүү колдонулуп келет.
«Кооператив боюнча менин 25 жылдык тажрыйбам бар. Турак жай кооперативи боюнча бизде түшүнүк жокко эсе. Биз кооперативдин табиятын түшүнбөй жатабыз. Дүйнөлүк тажрыйбадан үйрөнүшүбүз керек. Башка өлкөлөрдө кооперативдер мамлекет тарабынан көзөмөлгө алынып, колдоо көрсөтүлүп, пайдаланылып келе жатат. Мисалы, Германиянын согуштан кийин калыбына келишине так ушул турак-жай кооперативдеринин жардамы тийген.
Бизде да элибиздин кызыкчылыгы үчүн Кыргызстанга дал келе турган форманы таап, ошого ылайык мыйзам иштеп чыгып, аны колго алып, көзөмөлдөө жүргүзүп, ачык-айрымдык киргизип иш алып барышыбыз керек», — деди ал.
Иманбекова ошондой эле турак-жай кооперативдерин өнүктүрүү жакшы нерсе экенин, элдерди турак-жай менен камсыз кылууда мамлекеттик саясат болуш керектигин билдирди.
«Турак-жай кооперативдеринин мыйзамын иштеп чыгуу керек. Мамлекетке жардам гана болот», — дейт ал.
