Баткендеги турак үйлөрдүн курулушу март-апрель айларында бүтөт - Акылбек Жапаров
Министрлер кабинети Баткендеги куралдуу кагылышуудан бузулган үйлөрдүн курулушун март-апрель айларында, ал эми социалдык объекттерди болсо 2023-жылдын сентябрына чейин бүтөт деп убада кылууда. Бул тууралуу минкабдын маалымат кызматы билдирди.
Баткен облусунда иш сапары менен жүргөн минкабдын төрөгасы Акылбек Жапаров Баткен облусуна баардык тараптан колдоо көрсөтүлүп, өзгөчө көңүл бөлүнөрүн белгиледи.
“Буйруса турак үйлөрдү куруу иштерин март-апрель айларында аягына чыгаралы деп жатабыз. Андан соң, үй эмеректерин толтуруу жагы дагы каралат”, – деди Жапаров.
Ошондой эле ал жергиликтүү жашоочулардын суроолоруна жооп берип жатып 2023-жылдын сентябрына чейин баардык социалдык объектилер бүткөрүлөөрүн билдирди.
Минкаб учурда жалпысынан 332 турак үйдүн курулушу толук бүткөрүлгөнүн маалымдады. Эскерте кетсек, жалпысынан жарактан чыккан 418 үйдү жаңыдан куруу каралган. Ал эми калган 86 турак үйдүн курулуш иштери мартта толук бүткөрүлүп, пайдаланууга берилээри күтүлүүдө.
