Энергетика министрлиги британиялык MINDDOCK LIMITED менен эки айлык меморандумга кол койду
Энергетика министрлиги менен британиялык MINDDOCK LIMITED DBA Enterprise Energy Investments компаниясынын ортосунда Жогорку-Нарын ГЭС каскадын куруу боюнча өз ара түшүнүшүү жөнүндө меморандумга кол коюлду. Бул тууралуу министрликтин маалымат кызматы билдирди.
Меморандумдун максаты Жогорку-Нарын ГЭС каскадын куруу боюнча долбоорду биргелешип ишке ашыруу болуп саналат. Жогорку-Нарын ГЭС каскадын куруу долбоору өзүнө 4 гидроэлектр станциясын (Акбулун, Нарын-1,2,3) камтыйт, алардын жалпы орнотулган кубаттуулугу 237.7 МВт жана жылдык орточо иштеп чыгуусу 942.4 млн кВтч.
Энергетика министри Таалайбек Ибраевдин айтымында, калктын саны өскөн сайын электр энергиясын колдонгондордун саны күндөн-күнгө өсүп баратат. Буга байланыштуу Жогорку-Нарын ГЭС каскадын куруу электр энергиясына болгон тартыштыкты жоюунун бир бөлүгү болуп саналат.
Меморандум кол коюлган күндөн тартып 2023-жылдын 15-апрелине чейин күчүндө болот. Эгерде тараптар меморандумга ылайык милдеттерди аткарбаса, көрсөтүлгөн датада автоматтык түрдө күчүн токтотот.
