Баткенде үйлөрдү калыбына келтирилүү токтоп калды – куруучулардын айлыгы эки айдан бери төлөнбөй жатат
Баткенде үйлөрдү калыбына келтирүү боюнча курулуш иштери токтотулду. Себеби, курулуш компаниясы жумушчулардын эмгек акысын төлөбөй жатат. Бул тууралуу Kloop басылмасына аймактын тургундары билдирди.
Баткен районунун тургундары үйлөрүн калыбына келтирүү боюнча курулуш иштери токтоп калганын марттын ортосунда басылмага билдиришкен. Kloop өз материалында мындай окуялардын бир нечесин келтирет.
«Подрядчылар куруучуларга акчасын бербей, эки айдан бери дайынсыз болуп кетишкен. Алар [курулушчулар] убада берип: «Төлөсө, иштейбиз» дешет. Үйүбүздүн чатыры жабылды, фасады бүттү, үйдүн ичине гипсокартон орнотулду, бирок терезелери, эшиктери орнотулбай, ванна бүтө элек – баары турат. Негизинен үйдүн ичиндеги бардык иштер бүтө элек. Капчыгай айылында «Доор» фирмасынын колунда 20дан ашык үй бар. Алардын баары ушундай абалда», – дейт Ак-Сай айыл аймагынын Капчыгай айылынын тургуну Шарипа Кудайбердиева.
«Интербилим» эл аралык борборунун Оштогу филиалынын юристи Нуркыз Жанышбекова Баткен облусунда курулушчулар акчаны өз убагында алышпай, тургундар үйлөрдүн сапатсыздыгын айтып жатканын басылмага ырастады.
«Капчыгайда жалпысынан 50 үйдүн курулушу бүтө элек. Кээ бир тургундар алардын сапатсыздыгына, кээ бир үйлөр архитектуралык талаптарга жооп бербегендигине даттанышкан. Маселен, ваннадагы плиткалар шыпка чейин болушу керек эле дешет, бирок куруучулар дубалдын ортосуна чейин жасашкан. Септик үйдүн жанынан казылган, алар 15 метр аралыкты да калтырышкан эмес», – деди Жанышбекова.
