«Кыргызалтын» россиялык «Березовский рудник» менен бирге алтынды бөлүп алуунун жаңы ыкмасын колдонмокчу
10-апрелде Екатеринбург шаарында «Кыргызалтын» ААК менен «Березовский рудник» ири тоо-кен компаниясынын ортосунда өз ара кызматташуу жөнүндө меморандумга кол коюлду. Бул тууралуу «Кыргызалтындын» маалымат кызматы билдирди.
Тараптар Кыргызстан менен Россия ортосундагы эки тараптуу кызматташуунун эң актуалдуу маселелерин талкуулашып, эки өлкөнүн тоо-кен тармагын өнүктүрүү маселелерине басым жасашты.
«Кыргызалтын» ААК башкармалыгынын төрагасы Кубат Абдраимовдун билдирүүсү боюнча, кызматташтыктын алкагында алтынды жаңы метод менен бөлүп алуу боюнча алдыңкы технологияны кеңири колдонуу болуп эсептелет. Себеби мурдагы алтынды бөлүп алуу ыкмасына караганда жогорудагы жаңы метод эки эсе арзан түшөөрү иш жүзүндө аныкталган.
Аны менен катар тараптар өз кызматкерлеринин тажрыйба алмашууларына, айлана-чөйрөгө кен иштетүүнүн тийгизген таасирин минималдаштыруу жаатында иш алып барууга кызыкдар экендигин белгилешти.
Айта кетсек, «Березовский Рудник» — 1745-жылдан бери иштеп жаткан Уралдагы эң байыркы тоо-кен ишканасы болуп саналат. Алтын кен 275 жылдан бери Россиянын баалуу сырьё менен камсыз кылып келе жаткан, дүйнөдөгү эң узак иштеген алтын кендердин алдыңкы сабында турат.
