Электрондук товардык-транспорттук коштомо кагаз бизнес үчүн дагы эле көйгөй бойдон калууда
Электрондук товардык-транспорттук коштомо кагаз (ЭTТК) Кыргызстандагы бизнес үчүн дагы деле көйгөй болуп саналат. Бул тууралуу Эл аралык ишкерлер кеңешинин жетекчиси Аскар Сыдыков «КР жаңы салык саясаты: бизнестин жана өкмөттүн позициясы» аталган тегерек столдун жүрүшүндө билдирди.
Аскар Сыдыков ЭТТК өзгөчө кичи жана орто бизнес үчүн көйгөй болуп жатканын айтты.
«Бизге көбүнчө чакан жана орто ишканалардын өкүлдөрү арызданышат. Баарынын эле бухгалтерди ишке алууга чамасы жок. Ири бизнес көнүшүп кетти, бирок аларда да кичи жана орто бизнес менен иштешкенде маселе жаралып жатат», — деди ЭИК жетекчиси.
Аскар Сыдыков ошондой эле жыл бою ишкерлер Экономика министрлиги менен биргеликте Салык кодексине толуктоолорду киргизип чыгышканын айтты. Өзгөртүүлөр Салык кодексин алда канча жакшырткан.
«Биз жаңы кодексти башынан аягына чейин текшерип чыктык, биздин 12 сунушубуз эске алыныптыр, дагы экөө боюнча бир пикирге келип, 11и кабыл алынбаптыр. Кабыл алынбагандардын арасындагы эң негизгиси — накталай эмес төлөмдөр үчүн нөлдүк ставканы узартуу боюнча түзөтүү болчу. Бизнес дал ушул түзөтүүнү күтүп жаткан, накталай эмес төлөмдөргө өтө башташкан эле, бирок бул эми кызыксыз болуп калды. Демек, бул көрсөткүч улам төмөндөйт», — деп айтты Сыдыков.
