Электрондук мамлекеттик сатып алууларда кутум фактору жокко чыгарылды – Финансы министрлиги

Электрондук мамлекеттик сатып алууларда кутум фактору жокко чыгарылды. Бул тууралуу Финансы министрлиги маалымдады.

Маалыматка ылайык, министрликтин тарабынан мамлекеттик сатып алууларды электрондук форматка өткөрүү ишке ашырылган. Ошол эле учурда, мурда сатып алуу жол-жоболоруна катышууга табыштамалар конверттерде сатып алуучу уюмдун өзүнө кол менен берилген, башкача айтканда коррупциялык тобокелдик жана кутум фактору болгон, ал жокко чыгарылган.

«Бүгүнкү күндө бардык сатып алуучу уюмдар мамлекеттик сатып алуулардын электрондук веб-порталына которулду. Мамлекеттик бюджеттен каржылануучу бардык мамлекеттик мекемелер сатып алуулардын жол-жоболорун пландоодон баштап, мамлекеттик сатып алууларды жыйынтыктоого чейин электрондук форматта ишке ашыра башташты», - деп министрлик эскертти.

Бүгүнкү күндө Мамлекеттик сатып алуулар департаменти сатып алууларды пландаштыруу, сатып алуулар жөнүндө документтерди иштеп чыгуу, сатып алуу жөнүндө кулактандырууларды жарыялоо, сунуштарды ачуу, баалоо жана салыштыруу, жеңүүчүнү тандоо, контракт түзүү этабынан баштап сатып алуулар жол-жоболорунун бардык этаптарын өткөрөт, башкача айтканда жеткирүүчүлөр (подрядчылар), консультанттар мамлекеттик сатып алуулар веб-порталы аркылуу сатып алуулар жол-жоболоруна катышууга өз табыштамаларын беришет, ошондой эле конкурстук комиссия кокустан тандоо методу менен мамлекеттик сатып алуулар порталы тарабынан автоматтык түрдө аныкталат.

Коомчулук тарабынан мамлекеттик сатып алуулардын электрондук форматына өтүү ийгиликтүү катары бааланып, кагаз форматын алып салуу аркылуу сатып алуулардын электрондук системасындагы жылыш катары бааланды. Ошондой эле, мамлекеттик сатып алуулар порталына эл аралык аудит жүргүзүлүп, анда системага тиешелүү баа берилген.