Депутаттар Малайзиянын Инвестицияларды өнүктүрүү башкармалыгы менен жолугушту
Жогорку Кеңештин депутаттары Малайзия мамлекетиндеги иш сапарынын алкагында аталган өлкөнүн Инвестицияларды өнүктүрүү башкармалыгынын Аткаруучу директору Нажихан Абас менен жолугушту. Бул тууралуу парламенттин маалымат кызматы билдирди.
Жолугушуунун жүрүшүндө Транспорт, коммуникациялар, архитектура жана курулуш боюнча комитетинин төрагасы Мурадил Сыдыков жагымдуу инвестициялык климатты түзүү боюнча Кыргызстанда көрүлүп жаткан чараларга токтолду.
Муну менен катар малайзиялык ири ишканаларды тартуу менен Кыргызстандагы эркин экономикалык аймактарда инвестициялык долбоорлорду ишке ашыруу демилгесин сунуш кылды. Тагыраагы, транспорттук-логистикалык түйүндөрдү жана финансы-экономикалык борборлорду курууга чакырды.
Нажихан Абал Малайзия кыргыз тарап менен биргеликте КРнын потенциалдуу инвестициялык долбоорлорун изилдөөгө даяр экенин кошумчалады.
Жолугушуунун жыйынтыгында тараптар кызматташуунун потенциалдуу багыттарын аныктоо максатында Кыргыз Республикасы менен Малайзиянын тиешелүү түзүмдөрүнүн жолугушуусун уюштурууну макулдашышты.
