Быйыл климатка байланыштуу айдап себүү иштери графиктен бир аз кечеңдеди – Айыл чарба министрлиги
Быйыл жазгы талаа иштери эрте башталган, бирок климатка байланыштуу айдап себүү иштери графиктен бир аз кечеңдеди. Бул тууралуу Айыл чарба министрлигигин өкүлү Жигиталы Жумалиев айтып берди.
Анын айтымында, ошентсе дагы учурда жазгы талаа иштери дээрлик жыйынтыкталып, Нарында гана 20-30% иш калды. Эң башкысы, дыйкандар кант кызылчасын эгип жетишти. Анын аянты былтыр 9 миң гектар болсо, быйыл 14 миң гектардан ашты.
«Өзгөчө Таласта көп жылдан бери төө буурчак себилип, монокультура болуп калган. Бул өз кезегинде таасирин тийгизип, биринчиден, үрөндүн сапаты начарлады. Экинчиден, ар кандай топурактын оорулары пайда болуп, түшүмдүүлүк начарлоодо», - деп адис облустагы кырдаал жөнүндө айтып берди.
Ошондуктан министрлик дыйкандар менен иш алып барып, кант кызылчасы 500 гектардан 1 000 гектарга жетти. Мындан тышкары, май өсүмдүгүнүн аянты көбөйтүлүп, Таласта майды кайра иштетүүчү ишкана ачылууда.
«Жыйынтыктар, анан божомолдор боюнча айдап себүү иштери толук бүткөндө так маалымат берилет. Бирок учурдагы ыкчам маалыматтар боюнча, дан эгиндеринин, кызылчанын, жашылчанын аянты көбөйүшү күтүлүүдө. Ал эми төө буурчактын аянты жылдагыдан салыштырмалуу азайышы мүмкүн», — деди Жумалиев.
