Бишкектин мэри курулуш компанияларды жолдорду курууга көмөктөшүүгө чакырды
Бишкек шаарынын мэри Эмилбек Абдыкадыров борбор калаанын түштүк пландоо зонасында объектилери жайгашкан курулуш компаниялардын өкүлдөрү жана түзүмдүк бөлүмдөрдүн жетекчилери менен жыйын өткөрдү. Бул тууралуу мэриянын маалымат кызматы билдирди.
Мэр эле түштүк пландоо зонасында азыркы учурда объекттери курулуп жаткан же курууну пландаштырып жаткан курулуш компанияларын өздөрүнүн турак жай комплекстерине алып баруучу жолдорду курууга көмөктөшүүгө чакырды.
Жыйында «Бишкекбашкыархитектура» мекемесинин башчысы Урмат Карыбаев өз көз карашын билдирип, биринчи кезекте кайсы жолдорду курууга болорун айтып, презентацияда көрсөттү. Бул Жукеев-Пудовкин көчөсүнүн уландысы, Куттубаев, Молдобасанов жана борбор калаанын жогорку бөлүгүндөгү аты жок көчөлөргө асфальт төшөө зарылдыгы.
Ири курулуш компанияларынын өкүлдөрү мэрдин бул пикири менен макул болуп, жол салууга көмөк көрсөтүүгө даяр экендиктерин билдиришти.
Учурда түштүк пландоо зонасында 34 курулуш уюму курулуш иштерин жүргүзүүдө.
