Ош облусунунда аткезчилик менен алектенген бажычылар жана ишкерлер кармалды
Ош облусунда Кытайдан аткезчилик жол менен товарлардын реалдуу көлөмүн азайтып алып келүү фактылары аныкталды. Бул тууралуу УКМК билдирди.
Тергөөнүн маалыматына ылайык, 2023-жылдын апрель айынан тарта «К.Г.» ЖЧКнын, «Г.Д.» ЖЧКнын, «А.Т.» ЖЧКнын жана «К.Т.» ЖЧКнын өкүлдөрү Бажы кызматынын Түштүк-Батыш бажысынын кызматкерлери менен алдын ала сүйлөшүп алып, тараза күбөлүктөрүн бурмалоо аркылуу ташылып келинген жүктүн салмагын өзгөртүшкөн, анын негизинде бажы төлөмдөрүн төлөө шарты менен андан ары эсептөө жүргүзүлгөн.
Түштүк-Батыш бажысынын кызматкерлери жарыяланган документтер менен иш жүзүндөгү маалыматтардын ортосунда ачык-айкын айырмачылыктын белгилери бар экендигине карабастан, 100дөн ашык жасалма документтердин негизинде товарларды бажылык тариздөө иштерин жүргүзүшкөн.
«Түштүк-Батыш бажысынын кызмат адамдарынын жана аталган ЖЧКнын өкүлдөрүнүн мыйзамсыз аракеттеринин натыйжасында 200 тоннадан ашык товар бажы төлөмдөрүн төлөөдө эсепке алынбай, мамлекеттик бюджетке өзгөчө ири өлчөмдө зыян келтирилген», - деп мекеме белгиледи.
Бул факты боюнча «Ош» бажы процедуралары борборунун бажы эрежелерин сактоо боюнча тобунун эки инспектору С.И.Ч. жана М.К.А., ошондой эле Т.Т.Ж. жана А.А.А. компанияларынын өкүлдөрү кармалып, КРнын Юстиция министрлигине караштуу ЖАКнын №25 тергөө абагына киргизилди.
Учурда мамлекетке келтирилген зыянды аныктоо, бул кылмышка тиешеси бар башка адамдарды аныктоо иштери жүрүп жатат.
