Жыртык-тешиктерибизди бүтөй албай жатып пансионаттарга кайдагы акча — президент төрт пансионат Өзбекстанга эмнеге берилерин айтты
Президент Садыр Жапаров "Кабар" агенттигине маек берип, анда Ысык-Көлдөгү төрт пансионаттын Өзбекстанга 49 жылга башкарууга берүү себебин айтты.
Агенттиктин Өзбекстанга Ысык-Көлдөгү төрт пансионаттын 49 жылга ижарага берилишине социалдык тармактардын колдонуучулары нааразычылыгы тууралуу суроолоруна Жапаров расмий Ташкенттин эл аралык сотко бергендин натыйжасы менен жооп берди.
"Төрт пансионат боюнча кеп мындай. 2016-жылы Темир Сариев премьер-министр болуп турганда мен ачыгын айтайын, популисттик кылып эле алып койгон. Архивдик кагаздарды окуп чыгып, келечегин жакшылап карап, жети өлчөп бир кесиш керек эле. Тагыраак айтсам, эл аралык соттон утулбай турган болсок анан алып койсо болмок.
Ошол эле жылы өзбек тарап Вашингтонго эл аралык сотко 65 млн долларга доо арыз бериптир. 2017-жылы Сапар Исаков өзбек тарапка кат жөнөткөн экен: "Тынчтык жолу менен чечели, силерге 4 пансионатты кайра берели, силер эл аралык соттон доо арызыңарды алып койгула", - деп. Алар алган эмес. Кечээ жакында, май айында эл аралык сот кыргыз тарап 40 миллиондон ашыгыраак доллар төлөйсүңөр деген чечим чыгарды. Биз эки жак келишип, "Анча акчаны төлөй албайбыз. Андан көрө силер 49 жылга алгыла, 4-5 жылдыздуу мейманканаларды кургула" деп келиштик. Ал пансионаттардын ахывалын көрсөңөр аткана. Биз өзүбүз жакынкы 15-20 жылда ал пансионаттарга бир тыйын сала албайбыз. Башка жыртык-тешиктерибизди бүтөй албай жатып ал пансионаттарга кайдагы акча.
Ал 4 пансионатты саталы десек 40 миллионго эмес 4 млн долларга эч ким сатып албайт. Ал эми 5-10 жылга бербейлиби деген бул түркөйлүк. 4-5 жылдыздуу жатаканаларды куруп бүткүчө эле 5-10 жыл кетет. Анан кайсы мамлекет короткон акчасын актабай туруп биз үчүн куруп бермек эле", - деди ал.
Эскерте кетсек, төрт пансионатты Өзбекстанга башкарууга берүү тууралуу чечим ушул жуманын башында Чолпон-Атадагы кыргыз-өзбек өкмөттөрүнүн биргелешкен комиссиясынын 10-жыйынында кабыл алынган. Ага ылайык, "Золотые пески" пансионаты "Ташкент механикалык заводуна", "Дилором" пансионаты "Асакабанк" компаниясына, "Рахат" эс алуу жайы "Өзбекстандын тышкы экономикалык улуттук банкына", ал эми "Бустон" "Узпромстройбанк" банкына берилмекчи болгон.
