Альянс Алтын лабораториясы ISO/IEC 17025:2019 эл аралык аккредитациясын алды
«Альянс Алтын» ЖЧКсынын Борбордук анализ жана аналитикалык лабораториясы ISO/IEC 17025:2019 эл аралык стандартына ылайыктуулугу боюнча аккредитациялык сертификатка ээ болду. Бул тууралуу компаниянын басма сөз кызматы билдирди.
Компания белгилегендей, бул стандарт сыноо жана калибрлөө лабораторияларынын компетенциясына талаптарды белгилейт жана алардын масштабына карабастан лабораториялык сыноолорду жүргүзгөн бардык уюмдарга жайылтылат.
Аккредитация лабораториянын аналитикалык изилдөө жана өлчөө сапаты жаатындагы эл аралык талаптарга жооп берерин тастыктайт. Ал тоо тектерин, рудаларды жана алардын кайра иштетилген продуктуларын анализдөөгө тиешелүү. Алынган статус кызматкерлердин жогорку тактыгын, ишенимдүүлүгүн жана кесипкөйлүгүн, ошондой эле колдонулган ыкмалардын тоо-кен тармагынын заманбап талаптарына ылайыктуулугун көрсөтөт.
Бул өндүрүш процессинин бардык этаптарында сапатты көзөмөлдөөгө мүмкүндүк берет. Эл аралык сертификаттын берилиши компанияга чет өлкөлүк долбоорлорго катышуу үчүн жаңы мүмкүнчүлүктөрдү ачып, анын жоопкерчиликтүү жана технологиялык жактан жабдылган жер казынасын пайдалануучу катары позициясын бекемдейт.
Маалымдама: ISO/IEC 17025:2019 – бул лабораториялардын компетенциясына жалпы талаптарды аныктаган эл аралык стандарт. Ага ылайык аккредитация зарыл ресурстардын, квалификациялуу персоналдын болушун жана сыноодо жана калибрлөөдө заманбап методдорду колдонууну билдирет.
