Айдоочуларды даярдоо боюнча билим берүү ишин лицензиялоого убактылуу тыюу салынды
КРнын Министрлер Кабинети транспорт каражаттарынын айдоочуларын даярдоо жана кайра даярдоо боюнча билим берүү ишин лицензиялоого убактылуу тыюу салуу жөнүндө токтомду кабыл алды. Тиешелүү чечимге Кыргыз Республикасынын Министрлер Кабинетинин Төрагасы Адылбек Касымалиев кол койгондугу тууралуу өкмөттүн расмий сайтында маалымдалды.
Билдирүугө караганда, мындай чечим транспорт каражаттарынын айдоочуларын даярдоонун жана кайра даярдоонун сапатын жакшыртуу максатында кабыл алынган.
Документке ылайык, лицензияны кайра тариздөөнү, дубликатын берүүнү, токтотуп турууну, кайра жаңылоону, токтотууну жана жокко чыгарууну кошпогондо, 2025-жылдын 20-октябрынан тартып 2027-жылдын 31-декабрына чейин лицензиялоого убактылуу тыюу салуу киргизилди.
Бул көрсөтүлгөн убактылуу тыюу салуу (мораторий) мамлекеттик билим берүү мекемелерине жайылтылбайт.
