Ага-Хан фонду Каба токой чарбасына 2 млн сомго жакын инвестиция тартты
2026-жылы Ага-Хан фондунун колдоосу менен ишке ашырылып жаткан долбоорлордун алкагында Каба токой чарбасына 1 млн 900 миң 402 сомдук материалдык-техникалык колдоо көрсөтүлдү. Бул тууралуу Токой кызматы билдирди.
Анын ичинде:
• "Токойлорду жашылдандыруу жана колдоо" долбоору аркылуу экме токойлордун аянтын тосуу үчүн 1 млн 654 миң сомго зым тосмо сатып алынды. Бул экме токойлорду коргоого жана алардын өсүп-өнүгүүсүнө шарт түзүүгө багытталган.
• Токой көчөтканаларын өнүктүрүү долбоорунун алкагында 246 миң 402 сомго жамгырлатып сугаруу системасынын жабдуулары алынды. Система көчөттөрдү өз убагында сугарууга, сууну үнөмдүү пайдаланууга жана сапаттуу көчөттөрдү өстүрүүгө шарт түзөт.
Маалыматка караганда, көрсөтүлгөн колдоо Каба токой чарбасынын материалдык-техникалык базасын жакшыртууга, экме токойлорду коргоого жана токой чарбасынын туруктуу өнүгүшүнө салым кошот.
