Салык кызматынын башчысы КМШнын салык кызматынын жетекчилеринин жыйынына катышты
КРнын Мамлекеттик салык кызматынын төрагасы А.Шыкмаматов РФнын Санкт-Петербург шаарында өткөн КМШга мүчө мамлекеттердин салык кызматтарынын жетекчилеринин координациялык кеңешинин 32-отурумуна катышты. Жыйындын жүрушундө катышуучулар көмүскө экономикага каршы күрөшүү, товар агымын көзөмөлдөө системасы аркылуу көзөмөл, салык инспекторунун заманбап шарттардагы ролунун өзгөрүшү, фискалдык органдардын кызматкерлеринин квалификациясын жогорулатуу, тажрыйба алмашуу жана заманбап чакырыктарга карата чечимдерди кабыл алуу маселелерин талкуулашты.
КРнын Мамлекеттик салык кызматынын төрагасы А.Шыкмаматов өз сөзүндө Кыргызстанда салык инспекторунун ролу өзгөрүп жатканы тууралуу айтып берди.
“Тарыхта салык кызматкери мамлекеттин күч органдарынын өкүлү катары кабыл алынчу. Анын негизги милдети бюджетке кирешелердин түшүүсүн камсыз кылуу болгон, ал эми бул иш көп учурда технологиялар чектелген, салык төлөөчүлөрдүн ишеними төмөн шарттарда аткарылган. Бүгүн биз таптакыр башка доорду — диалогдун жана санариптик чечимдердин доорун көрүп жатабыз”, — деди КРнын Салык кызматынын башчысы.
Ошондой эле ал, Кыргызстан салык инспекторлорунун жаңы философиясын — коркутууга жана жазалоого эмес, билимге, диалогго жана биргелешкен жоопкерчиликке негизделген жаңы философиясын калыптандырууга жигердүү катышууга ниеттенип жатканын билдирди.
