Кыргызстан менен Камбоджа кош салык салууну жоюу боюнча сүйлөштү
Кыргызстан менен Камбоджанын делегациялары кирешелерге кош салык салууну жоюу жана салык төлөөдөн качуунун алдын алуу боюнча макулдашуунун долбоорун талкуулашты. Бул тууралуу Экономика министрлиги маалымдады.
Билдрирүүгө караганда, сүйлөшүүлөрдүн биринчи раунду 26–28-октябрь күндөрү видеоконференция форматында өттү. Анда тараптар салык салууга байланышкан негизги маселелерди карап, бир катар принципиалдуу жоболор боюнча макулдашууга жетишти.
Жолугушуунун жыйынтыгында тараптар сүйлөшүүлөрдү улантып, макулдашуунун долбоорун 2027-жылдын биринчи кварталында кол коюуга даярдоону макулдашты.
Белгиленгендей, макулдашуу эки өлкөнүн резиденттеринин кирешелерине кош салык салууну жоюуга, салык төлөөдөн качуунун алдын алууга жана салык милдеттенмелеринин ачыктыгын камсыз кылууга багытталган.
Ошондой эле документтин кабыл алынышы Кыргызстан менен Камбоджанын ортосундагы соода-экономикалык байланыштарды кеңейтүүгө, инвестиция тартууга жана ишкерлер үчүн жагымдуу шарттарды түзүүгө өбөлгө болору күтүлүүдө.
