Санариптешүү - кант кызылчасын өндүргөн дыйкандардын түйшүгүн азайтууда
Кант кызылчасын өндүрүүчүлөрдүн күнүмдүк жашоо-турмушун жеңилдетүү максатында алардын Кант заводу менен байланышы мурдагыдай убакытты жана кыймыл аракетти талап кылбай - иреттүү маалымат технологияларын колдонуу менен ишке ашырылып калган. «Кайыңды-Кант» жана «Кошой» кант заводдорунун директорлор кеңешинин мүчөсү Руслан Рафибеков, кант кызылчасын өндүрүүчүлөргө ыңгайлуу болсун үчүн атайын тиркеме үзгүлтүксүз иштеп жаткандыгын билдирди. Анын айтымында, мобилдик тиркеме бир нече жылдан бери бар жана ал жыл сайын жаңыланып турат.
“Бизде бардык жерде электрондук тараза бар. Ага ылайык, кант кызылчасы менен келген машина кызылчаны кабыл алуучу пункттан чыгып кетээри менен фермер тиркемеси аркылуу бул машиненин параметрлерин көрө алат. Башкача айтканда машинедеги кызылчанын жалпы салмагынан баштап, анын кирдүүлүгү, шекердүүлүгүн да көрүүгө болот”.
Ошондой эле, тиркеме аркылуу фермер үйүнөн чыкпай туруп эле, кант кызылчасынын уругун сатып ала алат жана каалаган өлчөмдө шекерин сатууга да мүмкүндүгү бар.
“Быйыл биздин адистер электрондук кезекке турууну модернизациялап, иштеп чыгышты. Анткени былтыр тажрыйба көрсөткөндөй ири көлөмдөгү кызылча өндүрүлгөн кезде, аябай узун кезек болуп, көйгөй жаратты. Машинеге суроо талап өсүп, дефицит болуп, ошого жараша баалар да кымбаттап, былтыр кыйын болгон. Ошондуктан ушул электрондук кезектин долбоору быйыл иштелип чыгып, элдер ошонун негизинде кезекке туруп жатышат. Мындан кийин дагы бул тиркемени жакшыртып фермерлерге ыңгайлуу кылып, иштете беребиз.” – деп билдирди «Кайыңды-Кант» жана «Кошой» кант заводдорунун директорлор кеңешинин мүчөсү Руслан Рафибеков.
Анын айтымында, жыл сайын аталган эки кант завод менен 3 минге жакын фермер келишим түзөт. Бул көп. Бирок, ушул санариптик автоматташтырууга ылайык, эч көйгөйсүз фермерлер менен контракт түзүлүп, урук сатып алуунун баардык этабы үйдөн чыкпай эле автоматтык турдо ишке ашырылып жатат.
