Ф.Иминов: Санариптик сабаттуулук боюнча кыргызча платформа сунушталат
КРнын Президентине караштуу Виртуалдык активдер жана блокчейн-технологияларды өнүктүрүү боюнча Улуттук кеңештин секретариатынын жетекчиси Фархат Иминов, өлкөдө санариптик сабаттуулукту жогорулатуу аракети жолго салынып жаткандыгын бүгүн аталган кеңешменин отурумунда билдирди. Анын аытымында санариптик сабаттуулукту жогорулатуу жана билим берүү долбоорлорун ишке ашыруу Binance компаниясынын колдоосунун алдында жүрүп жатат.
“Binance академиясы тарабынан иштелип чыккан кыргыз тилиндеги онлайн билим берүү платформасын ишке киргизүү үчүн Binance менен кызматташып жатабыз. Платформа азыркы учурда аягына чыкканы калды жана жакында ал виртуалдык активдер менен иштөө боюнча базалык билим алууну каалагандардын баарына жеткиликтүү болот” – деп билдирди, Иминов.
Ошондой эле ал өлкө боюнча ЖОЖ менен биргеликте лекцияларды өткөрүп, санариптик сабаттуулук боюнча окутуу курстарын ишке ашыруу иштери уюштурулуп жаткандыгын билдирди.
