Салык кызматы 4,6 млн сомдук мыйзамсыз жүктүн өлкөгө киришине бөгөт койду

КРнын Мамлекеттик салык кызматынын кызматкерлери өлкөнүн аймагына жалпы суммасы 4,6 млн сомду түзгөн, коштомо документтери жок товарлардын бир катар түрлөрүн мыйзамсыз алып кирүү аракетине бөгөт койду.

 Аталган кызматтан маалымдагандай, кыргыз-казак мамлекеттик чек арасынан өткөндөн кийин Mercedes Sprinter  автомашинасы текшерилип, андан коштомо документтери жок жүк ташуучу унаалар үчүн ар кандай тетиктер табылган. Аталган товарлардын жалпы баасы 2,1 млн сомдон ашат.

 Ошондой эле эсепке алынбаган товардын бар экендигине шек жараткан Volvo үлгүсүндөгү жүк ташуучу автоунаа каралган. Аны текшерүүнүн жүрүшүндө тиешелүү коштомо документтери жок товарлар — тармактык кабелдер, өрт системасы үчүн датчиктер, акциздик маркасы жок мотор майлары, лак кетирүүчү суюктуктар, оюнчуктар жана башка аталыштар табылган. Аныкталган товардын жалпы суммасы 2,5 млн сомду түздү.

 Бул автоунаалар айып короо жайына киргизилди. Мыйзамсыз жүктү алып кирүү фактылары боюнча тиешелүү актылар түзүлдү.