Кыргызстанда 3926 алимент карызкору дарегин өзгөрткөн
Кыргызстанда 2025-жылдын 9 айында алимент төлөмүнүн көлөмүн азайтыш үчүн жашаган дарегин өзгөрткөн 3 926 карызкор катталганын Башкы прокуратурага караштуу Сот аткаруучулар кызматынын жетекчисинин орун басары Кубанычбек Капалов билдирди.
Анын маалыматына ылайык, эгер алимент боюнча карызкор расмий бир жерде иштебесе жана кирешеси жок болсо, анда алименттин көлөмү анын жашаган регионундагы орточо маянанага ылайык эсептелет. А ар башка райондо орточо эмгек акы ар кандай болгондуктан айрым карызкорлор алиментти аз төлөш үчүн киреше деңгээли аз райондорго катталышат.
Алименттин көлөмү ушул тапта бир балага кирешенин – 25%ы, 2 балага – 33%ы, 3 же андан ашык бала болсо кирешенин – 50%ы төлөнөт.
Эске салсак, ушул жылдын 23-июнунда Президенттин алимент төлөбөй жүргөн карызкорлордун жоопкерчилигин күчөтүү боюнча жарлыгы чыккан. Ага ылайык алимент төлөөдөн качкандар Укук бузуулар кодексинин 443 -беренесине – 3 суткадан 7 суткага чейин камакка алуу жана Кылмыш Кодексинин 178-беренесине – эркинен ажыратуу өзгөртүүлөрү кирген.
