«Манас» кинотеатрында көрүүгө акысыз кинолор сунушталууда
Кече 29-октябрда, Бишкек шаарындагы “Манас” кинотеатрында “Россия киносунун фестивали Кыргызстан 2025” старт алды. Фестивалдын ачылыш аземине РФнын маданият министри Ольга Любимова, КРнын маданият, маалымат жана жаштар саясаты министри Мирбек Мамбеталиев, кинорежиссёр Никита Высоцкий, ишчаранын уюштуруучулары жана 500 ашуун кино сүйүүчүлөр катышышты.
Фестиваль Россия Федерациясынын маданият күндөрүнүн алкагында РФнын Маданият министрлигинин колдоосу менен РОСКИНО тарабынан Кыргызстанда бешинчи ирет уюштурулууда.
КРнын маданият министри М.Мамбеталиев сөз сүйлөп, кино эки өлкөнүн ортосундагы достуктун жана өз ара байланыштын эң күчтүү көпүрөсү болоорун баса белгилеп, жергиликтүү калкка ар турдүу жанрдагы 6 кинону акысыз көрүүгө сунушталып жаткандыгы үчүн, РФнын маданият министрлигине ыраазычылык билдирди.
Ал эми РФнын маданият министри О.Любимова, маданият жана кино аркылуу орус-кыргыз кызматташтыгын өнүктүрүү эки өлкөнүн ортосундагы стратегиялык өнөктөштүктү чыңдоодогу артыкчылыктуу багыт экенин белгиледи.
“Бул жылы эки элибиз үчүн бирдей маанилүү болгон Улуу Ата Мекендик согуштун 80 жылдыгына өзгөчө көңүл бурулууда. Биз сиздерге көрсөтүү үчүн ата-бабаларыбыздын баатырдык тарыхына арналган бир нече тематикалык тасмаларды тандап алдык”- деп билдирди, РФнын маданият министри.
Фестивальдын программасынын ачылышы 1944-жылдын жайында советтик контрчалгындоочу офицерлердин иши жөнүндөгү «Август» согуштук драмасы менен башталды. Эми 2-ноябрга чейин «Манас» кинотеатрынын чоң залынан “Советтер Союзунун сүйүүсү”, “Тизмеде аты жок”, “Кракен” “Олимпте биринчи” көркөм тасмалары жана “Доктор Динозавров” аттуу анимациялык тасма акысыз сунушталмакчы.
