Кыргызстанда айрым табийгый чөптөрдү чогултууга тыюу салынганы эскертилди
МинКаб 2024-жылдын 28-майындагы №270 токтом менен 2027-жылдын 1-майына чейин Кыргызстанда өскөн айрым өсүмдүктөрдү пайдаланууга убактылуу тыюу салганын кайрадан эске салды.
Мындай чечим жаратылышты коргоо жана айрым сейрек кездешүүчү өсүмдүктөр түрүн сактоо үчүн кабыл алынганын Жаратылыш ресурстары, экология жана техникалык көзөмөл министрлиги билдирди.
Министрликтин маалыматы боюнча колдонууга тыюу салынган өсүмдүктөргө: макротомия, арбения, ясенец, аконит, афлатун пиязы, родиола, самарканд соолубас гүлү жана бир нече өсүмдүк кирет.
Буларды эми терип кайра иштеткенге, сатып алууга жана сатууга, ташууга жана колдонууга, өлкөдөн сыртка чыгарууга тыюу салынат.
Бул тыюунун негизги максаты – жапайы өсүмдүктөрдүн корун сактоо, алардын тамырынын жок болуп кетишинин жана алардын жаратылыш чөйрөсүнүн бузулушунун алдын алуу.
