Долпран алтын кенинин башкы директору кармалды
Кемин районундагы Долпран алтын кенинин башкы директору, кытай жараны Т.Д. кармалганын УКМКнын маалымат кызматы билдирди.
Маалыматта белгиленгендей, Т.Д. жетектеген “Кемин Ресурс Групп” ЖЧКсынын ишинде көптөгөн мыйзам бузуу фактылары катталган.
Ведомствонун маалыматы боюнча, Жаратылыш ресурстары министрлиги менен Өзгөчө кырдаалдар министрлигинин токой кызматынын өкүлдөрүнөн турган комиссия Долпран алтын кенинде төмөндөгүлөрдү аныктаган:
- 14 миң 398,6 чарчы метр аянттагы жер кыртышын бузуу;
- техникалык долбоорго шайкеш келбөө;
- лицензиялык макулдашуулардын шарттардын аткарылбагандыгы;
- кен кору(запас) боюнча комиссияга такталбаган маалыматтарды берүү;
- “Кооптуу өнөр жай объектилердин өнөр жай коопсуздугу жөнүндө” мыйзамынын жана Ачык ыкма менен казылуучу пайдалуу кендерди өндүрүүнүн өнөр жай процесстеринин коопсуздук эрежелеринин көптөгөн бузулуулары.
Экспертизанын бүтүмүнө ылайык аталган алтын кенин иштетүүдө экологияга өтө чоң өлчөмдө зыян келтирилген. Октябрь райондук сотунун чечиминин негизинде алтын кен ишканасынын башкы директору УКМКнын тергөө абагына киргизилген.
