Өлкөдө жыл башынан бери көлдөрдөн 3,6 тонна таштанды чыгарылды
Кыргызстанда жыл башынан бери суу объектилеринен 160 чакырымдан ашуун балык уулоочу тор жана 3,6 тонна таштанды чыгарылды. Бул тууралуу Жаратылыш ресурстары министрлигинен маалымдашты.
Билдирүүгө ылайык, тазалоо иштери суу биоресурстарын коргоо, браконьерликке каршы күрөшүү жана суу экосистемаларын сактоо максатында жүргүзүлүүдө.
Негизги иштер Ысык-Көл жана Соң-Көл көлдөрүндө, Токтогул, Орто-Токой жана Киров суу сактагычтарында, ошондой эле өлкөнүн башка суу объектилеринде аткарылууда.
Министрлик эски синтетикалык торлор балыктарга жана башка суу жаныбарларына коркунуч жаратып, экосистемага зыян келтирерин белгиледи.
Учурда суу объектилерин торлордон жана таштандылардан тазалоо иштери уланууда.
