"Жети-Өгүз" санаторийин реконструкциялоо 2027-жылдын майында аяктайт
Ысык-Көл облусундагы "Жети-Өгүз" санаторийинде жүргүзүлүп жаткан реконструкциялоо иштери 2027-жылдын май айында толук аяктайт. Бул тууралуу Президенттин Иш башкармалыгынан билдиришти.
Маалыматка ылайык, 27-октябрда Президенттин Иш башкаруучусу Каныбек Туманбаев санаторийге барып, курулуш иштеринин жүрүшү менен таанышты.
Учурда санаторийде төрт кабаттуу жаңы башкы корпус, эки кабаттуу дарылоо корпусу жана жабык термалдык бассейндер курулуп, ички жасалгалоо иштери жүрүүдө. Ал эми 2 300 чарчы метрлик жатакана корпусунун реконструкциясы толук аяктаган.
Мындан тышкары, 400 орундуу ачык амфитеатр, конференц-зал, спорттук жана балдар аянтчалары курулууда. Ошондой эле эс алуучулар үчүн кошумча үйлөр салынып, аймакты көрктөндүрүү иштери жүргүзүлүүдө.
Каныбек Туманбаев курулуштун сапатына көңүл буруп, бардык иштерди белгиленген мөөнөттө аяктоону тапшырганы кошумчаланган маалыматта.
Белгилей кетсек, санаторий буга чейин президент Садыр Жапаровдун тапшырмасы менен Кесиптик бирликтер федерациясынан Президенттин Иш башкармалыгына өткөрүлүп берилген.
