Аламүдүн, Ала-Арча суу нугунан 107 миң тонна таштанды алынды
Бишкек мэриясынын маалыматына караганда, шаардагы дарыялар менен каналдарды тазалоо жана иретке келтирүү боюнча комплекстүү иштердин алкагында Аламүдүн жана Ала-Арча дарыяларынын нугу тазаланып, 107 миң тонна таштанды чыгарылды.
Ошондой эле дарыялардын эркин агышын камсыздоо, суу каптоонун алдын алуу жана коопсуз, экологиялык жактан таза шаардык чөйрө түзүү максатында, дарыялар менен каналдардын боюна мыйзамсыз курулган объектилерди демонтаждоо жүрүп жатат. Бүгүнкү күнгө карата 300гө жакын объект бузулуп, бул багыттагы иш уланып жатат.
Маалымдалгандай, көрктөндүрүү иштеринин алкагында биринчи ишке ашкан долбоор — "Алга" спорт комплексинин алдында, Абдрахманов жана Үсөнбаев көчөлөрүнүн ортосундагы участокто курулган променад болду.
Мындан сырткары, ЖЭБдин техникалык каналынын жанында да көрктөндүрүү иштери жүрүп жатат.
Бишкек шаарынын шаар куруу жана архитектура башкы башкармалыгында дарыялар жана каналдардын жээгин көрктөндүрүүгө байланыштуу эскиздик долбоорлор даярдалып, учурда долбоордук-сметалык документация иштелип жатат. Ал бүткөндөн кийин пландалган бардык участоктордо көрктөндүрүү иштери башталат.
