Кыргызстанда жеке ишкерлерди кайра каттоо жөнөкөйлөтүлдү
Кыргызстанда "Өкмөттүк акселераторлор" программасынын алкагында жеке ишкерлерди (ЖИ) кайра каттоонун жол-жобосу жөнөкөйлөтүлүп, негизги процесстер электрондук форматка өткөрүлгөнүн МинКаб басма сөз кызматы билдирди.
"Узак убакыт бою ишкерлер каттоо маалыматтарына анча чоң эмес өзгөртүүлөрдү киргизүү үчүн да салык органдарына жеке өзү барууга мажбур болуп келишкен. Телефон номерин же электрондук почта дарегин алмаштыруу, экономикалык ишмердүүлүктүн түрүн кошуу же өзгөртүү, башка салык режимине өтүү же юридикалык даректи өзгөртүү — бул операциялардын баары кагаз түрүндөгү арыз тапшырууну жана жеке барууну талап кылган", — делет МинКаб маалыматында.
Натыйжада ишкерлер ар бир жол-жобо үчүн орточо эсеп менен эки-үч саатка чейин убакыт коротуп, кезек күтүүгө туура келген. Ал эми юридикалык дарек башка районго өзгөртүлгөн учурда жол-жобо андан да татаалдашып, эки райондук салык органына кайрылууну талап кылган жана кароо мөөнөтү эки-үч жумушчу күнгө чейин созулган. Бул эскирген практика ишкерлерге ашыкча административдик жүк жүктөп, негизги ишмердүүлүктөн алаксыткан жана мамлекеттик кызматкерлер менен керексиз түз байланыштардын пайда болушуна шарт түзгөн.
"Бүгүн биз бул тоскоолдук системалуу түрдө жоюлганын ишенимдүү айта алабыз. “Өкмөттүк акселераторлор” программасынын алкагында жеке ишкерлерди кайра каттоонун негизги жол-жоболору толугу менен “Салык төлөөчүнүн кабинети” аркылуу онлайн форматка өткөрүлдү", — деп Министрлер кабинетинин төрагасы Адылбек Касымалиев аппараттык жыйында баса белгиледи.
