Россияда Кыргызстандан келген жашылчалар артка кайтарылды
14-декабрда фитосанитардык көзөмөл пункту "Черлакский" (МАПП "Ольховка") аймагында Россия ветеринардык жана фитосанитардык көзөмөл кызматынын Омск облусу боюнча инспекторлору Омск бажысынын мобилдик тобу менен биргеликте Кыргызстандан келе жаткан жашылчалар жүктөлгөн жүк ташуучу унааны токтотушкан.
Маалыматка ылайык, Россия Федерациясына киргизүү үчүн фитосанитардык тобокелдиги жогору болгон 21 тонна продукция багытталган. Жүктүн курамында пекиндик капуста, кызыл капуста, түрп, сабиз жана шалгам болгон.
Документтерди текшерүү учурунда фитосанитардык сертификат жараксыз деп табылган. Мындан тышкары, жүктү ташуучу коштоочу документтерде 1 тонна кызыл капустаны көрсөтпөгөнү аныкталган, бирок ал жүк бөлүгүндө чындап бар болгон.
Ведомстводо белгилешкендей, жүк тууралуу толук маалыматтын жоктугу карантиндик объектилерди мыйзамсыз алып кирүү коркунучун жогорулатат. Натыйжада ташуучу Россия Федерациясынын Административдик укук бузуулар кодексинин 10.2-беренеси боюнча административдик жоопкерчиликке тартылып, транспорт каражаты кызмат адамдарынын көзөмөлү астында Казакстандын аймагына кайтарылган.
Башкармалыктын маалыматы боюнча, 2025-жылдын башынан бери адистер өсүмдүк продукциясын мыйзамсыз алып кирүүнүн 34 аракетин токтотушкан. Анын ичинде мыйзам талаптарына жооп бербеген 480 тоннадан ашык жүк Казакстанга жана Кыргызстанга кайра жөнөтүлгөн.
