Кыргызстанда кинопавильон жана Dolby Atmos студиясы пайда болушу мүмкүн
Учурда прокаттык күбөлүктөрдүн дээрлик 70%ын жергиликтүү кинопродюсерлер алып жатышканын журналисттерге маданият, маалымат, спорт жана жаштар саясаты министри Мирбек Мамбеталиев билдирди.
Ошондой эле министр Кыргызстанда кинопавильон куруу ниети бар экенин айтып, бул демилгени өлкө жетекчилиги колдогонун белгиледи.
Маданият министрлиги Dolby Atmos үн жаздыруу студиясын түзүүнү да пландап жатат.
"Баарына белгилүү болгондой, биздин кинорежиссёрлор тасмаларды үн менен камсыздоо үчүн Москвага барышат. Бул абдан кымбат. Биринчиден, командировкалык чыгымдар, барып-келүү билеттери, жашоо. Экинчиден, үн жаздыруучу студияны ижарага алуу өтө кымбат. Эмне үчүн биз муну өзүбүздө кура албайбыз? Азыр мамлекет буга мүмкүнчүлүк бере алат", — деди Мирбек Мамбеталиев.
Ал учурда ведомство үн жаздыруучу студияны орнотуу үчүн техникалык мүнөздөмөлөрдү жана параметрлерди иштеп чыгып жатканын, 2026-жылдын аягына чейин бул студия толук ишке кирет деп үмүттөнөрүн кошумчалады.
"Биз кинопавильон курууну каалап жатабыз. Мамлекеттик буйрутма болгондо, биздин “Кыргызфильм” ошол жерде тасма тартат. Ал эми буйрутма жок кезде, павильон бош турса, жеке компаниялар келип пайдалана берсин. Натыйжада “Кыргызфильм” мындан киреше табат", — деп министр өз пландары менен бөлүштү.
Dolby Atmos — Dolby Laboratories компаниясы тарабынан иштелип чыккан көлөмдүү үн технологиясы. Алгач 2012-жылы кинотеатрларда колдонулган. Бул технологиянын өзгөчөлүгү — учурдагы көлөмдүү үн системаларынын мүмкүнчүлүктөрүн кеңейтип, бийиктик каналдарын кошуу аркылуу үндү үч өлчөмдүү объект катары кабылдоого шарт түзөт.
