Жапаров Баткенди өнүктүрүү долбоорлору менен таанышты
Өлкө башчысы Садыр Жапаров 11-октябрда Баткен жана Ош облустарына иш сапарынын алкагында Баткен районунун жана Баткен шаарынын өнүгүү долбоорлору менен таанышты. Бул тууралуу президенттин администрациясы кабарлады.
Баткен районунун акими Данир Иманалиевдин маалыматы боюнча, курулуш тармагында жалпы наркы 1 млрд 380 млн сомдук 69 объект ишке берилген: 12 мектеп, 13 бала бакча, 6 спорт зал, 25 футбол аянтчасы, 6 оюн аянтчасы жана 7 ФАП. Жыл аягына чейин дагы 6 объект бүткөрүлөт.
2021-2026-жылдары республикалык бюджеттен жолдорго 191 чакырым асфальт төшөлүп, 950 млн сом жумшалган. 11 айыл аймагына суу түтүктөрү тартылып, 550 млн сом бөлүнгөн. Зардалы айылына жарык жана интернет жеткирилип, "Сары-Талаа–Кызыл-Таш–Зардалы" 18 чакырым жолу 889,9 млн сомго курулган. Ирригацияда 73 чакырым канал курулуп, 1 млрд 203 млн сом жумшалган.
Баткен шаарынын мэри Сейтек Кулубаев 2021-2026-жылдары шаарда 148 ишкана ачылып, 686 жумуш орду түзүлгөнүн билдирди. Шаарда жалпы 2 млрд 57 млн сомдук 16 объект курулган, анын ичинде 3 мектеп, 10 админ имарат, чакан ГЭС жана асфальт заводу бар. Учурда 170 млн сомдук 6 оюн аянтчасы, суу түтүгү, автобус паркы жана башка иштер жүрүүдө.
Президент Баткендин актуалдуу маселелерин ырааттуу чечүү жана ресурстарды натыйжалуу пайдалануу зарылдыгын белгиледи.
