Кыргызстан ТИМи АКШ визасы маселесин чечүү жолун издеп жатат
Тышкы иштер министринин орун басары Медер Абакиров АКШнын Кыргызстандагы элчисине республиканын жарандарына виза берүүнүн татаалдашканына байланыштуу тынчсыздануусун билдирди.
ТИМдин басма сөз кызматы маалымдагандай, жолугушуунун негизги темасы кыргызстандыктар үчүн B-1/B-2 категориясындагы визаларды тариздөөдө АКШ тарабынан киргизилген жаңы талаптар болду. Медер Абакиров бул чаралар ишкерлер ортосундагы байланыштарды кыйындатып, соода-экономикалык алакалардын өнүгүшүнө тоскоол болуп жатканын белгиледи. Кыргыз тарап жарандардын сапарлары үчүн ыңгайлуу шарттарды түзүүгө чакырды.
Лесли Вигери кошумча талаптар кайсы бир конкреттүү өлкөгө каршы багытталбаганын түшүндүрдү. Анын айтымында, бул АКШнын жалпы миграциялык саясатынын бир бөлүгү болуп саналат. Тараптар визалык маселени чечүүнүн жолдорун биргелешип издөө боюнча макулдашышты.
Мындан тышкары, дипломаттар 4–5-февралда Бишкек шаарында өтө турган "В5+1" форумуна даярдык көрүү маселесин жана эки тараптуу мамилелердин учурдагы абалын талкуулашты.
