"Кара кыргыз" улуттук сериалын тартууга 35 млн сом жумшалган
Бул тууралуу бүгүн Жогорку Кеңештин илим, билим берүү, инновациялык өнүгүү, маалыматтык технологиялар, маданият, спорт жана жаштар иштери боюнча комитетинин жыйынында белгилүү болду.
Маданият министрлигинин өкүлдөрүнүн айтымында мурда ЖМКларга 40 млн сом жумшалганы тууралуу туура эмес маалыматтар чыгып кеткен.
Маданият, спорт жана жаштар саясаты министринин орун басары Марат Тагаевдин айтымында, УТРК каналында сериалдын биринчи сериясы көрсөтүлгөн.
"Бирок кийин Кинематография департаменти тарабынан кийинки серияларды көрсөтүүгө убактылуу тыюу салынды. Бул эфирде кээ бир техникалык катачылыктар табылгандыктан болду. Комиссия түзүлүп, бардык кемчиликтер оңдолгондон кийин сериал кайра эфирге чыгарылат", — деп кошумчалады ал.
Депутат Болот Сагынаев белгилегендей, "Кыргызфильм" көптөгөн тасмаларды тартат, жана аларга миллиондогон сом жумшалат.
"Кээ бир тасмалар өз натыйжасын көрсөтө алган жок. Мамлекеттик-жеке өнөктөштүктү өнүктүрүп, жеке продакшн студиялар менен кызматташуу зарыл. Алар заказ боюнча тасманы "Кыргызфильмге" караганда арзан чыгарып, ийгиликке жеткире алышат", — деп кошумчалады депутат.
