Кытайда телекоммуникациялык алдамчылык кылгандар өлүм жазасына тартылышты
Кытайда Мьянманын түндүгүндө иш алып барган жана телекоммуникация тармагындагы ири алдамчылык схемаларына тиешеси бар кылмыштуу топтордун 11 мүчөсүнө карата чыгарылган өлүм жазасы аткарылганын "Синьхуа" агенттиги билдирди.
Маалыматка ылайык, бул Мьянмадагы скам-борборлордун ишмердүүлүгүнө байланыштуу иш боюнча Кытайда өлүм жазасы биринчи жолу аткарылып жатат. Өкүм 2025-жылдын сентябрь айында Чжэцзян провинциясына караштуу Вэньчжоу шаарынын соту тарабынан чыгарылган. Соттолгондор "Мин" синдикатына кирген жана 2023-жылдын ноябрында Мьянманын аймагында, Кытай чек арасына жакын жерде кармалган. Бул тууралуу BBC да маалымдайт.
Сот аларды атайылап киши өлтүрүү, денеге оор жаракат келтирүү, мыйзамсыз эркинен ажыратуу, алдамчылык жана мыйзамсыз кумар оюндары жайларын уюштуруу беренелери боюнча күнөөлүү деп тапты. Соттун чечимине ылайык, кылмыштуу топтун аракеттеринин натыйжасында Кытайдын 14 жараны каза болгон.
Соттолгондор өкүмгө даттанышкан, бирок 2025-жылдын ноябрь айында Чжэцзян провинциясынын Жогорку элдик соту өкүмдү күчүндө калтырып, ишти Кытайдын Жогорку элдик сотуна кайра кароого жөнөткөн. Текшерүүдөн кийин Жогорку элдик сот өкүмдүн мыйзамдуулугун тастыктап, аны аткарууга уруксат берген.
Жогорку элдик соттун маалыматы боюнча, 2015-жылдан бери кылмыштуу топтун мүчөлөрү Мьянмада телекоммуникациялык алдамчылык жана мыйзамсыз кумар оюндарын жүргүзгөн бир нече базаны түзүшкөн. Кылмыштуу схемаларга тартылган каражаттардын жалпы көлөмү 10 млрд юандан (болжол менен 1,4 млрд доллар) ашкан. Кылмышкерлер адам өлтүрүү, сабоо жана адамдарды мыйзамсыз кармоо сыяктуу ыкмаларды да колдонушкан.
Өлүм жазасына өкүмдөр Жогорку элдик соттун макулдугу алынгандан кийин Вэньчжоу шаарынын соту тарабынан аткарылган.
Буга чейин, ноябрь айында, "Бай" синдикатынын беш мүчөсү да өлүм жазасына тартылган. Ал эми "Вэй" жана "Лю" аттуу дагы эки кылмыштуу топко карата соттук процесстер уланууда.
Мьянманын түндүгүндө скам-борборлор иштейт. Ал жерлерге адамдарды жумушка орноштуруу деген шылтоо менен чакырып, кийин күч менен кармап, документтерин тартып алышат жана алдамчылык схемаларга катышууга мажбурлашат. Баш ийбегендер зомбулукка жана кыйноолорго кабылышат.
