Маала башчыларына маяна чегерүү маселеси көтөрүлдү
Бишкек шаарында кварталдык (маала башчысы) кызматкерлерди шайлоо жана аларга айлык белгилөө зарыл экенин шаардык кеңештин туруктуу комиссиясынын “шаарга кошулган жаңы аймактарды өнүктүрүү” маселелерине арналган жыйынында депутат Казыбек Эргешов билдирди.
Анын айтымында, кошулган райондор үчүнчү жылдан бери иштеп жатат.
"Мурда шайланган адамдар болгон, бирок алар активист катары иштеп келишкен, айлык албай. Райондор аларга таянган. Маала башчылык — бул элдин добушу, маала башчылар аркылуу маалымат МАБдарга, депутаттарга, акимиаттарга ж.б. жетет. Мындан өткөн жылдан бери шайлоо жана айлык маселесин чечүү керек эле. Алар дайыма коомдук негизде иштей бербейт д"», — деп нааразычылыгын билдирди Казыбек Эргешов.
Мэриянын өкүлдөрү учурда маала башчылык схемасы иштелип жатканын белгилешти. "Андан кийин шайлоо өткөрүп, айлык беребиз. Азыр негизги максат — схеманы бүтүрүү", — деди бир кызматкер.
Казыбек Эргешов депутаттар жакын арада жергиликтүү бюджетти кабыл алмакчы экенин эске салып, ишти тездетүү керектигин айтты.
"Сиздер маала башчылык үчүн арыз тапшыргансызбы? Эгер жок болсо, аларга кайрадан айлык берилбейт. Райондор ылайга батып калат. Аларды шайлоо жана финансылоо боюнча долбоорду бюджетке киргизүү тапшырмасын берүү керек", — деп жыйынтыктады ал.
